Maison de la Laïcité

Le Gouvernement soutient la mise en place d’un réseau national de Maisons de la laïcité. Ces maisons sont le point de contact de la communauté laïque dans la cité. Elles constituent des lieux de rencontres, d’échanges, d’informations et de services. L’État participe jusqu’à concurrence de 75% aux frais d’infrastructures des centres régionaux. Les associations gestionnaires bénéficient d’une subvention forfaitaire annuelle pour frais de fonctionnement de la part de l’État.

Le Gouvernement confirme son attachement au système constitutionnel de la conclusion de conventions entre l’État et les communautés religieuses. Il entend l’étendre à d’autres communautés pour autant que celles-ci aient des activités substantielles et un nombre important d’adhérents au Luxembourg et qu’elles s’engagent à respecter la Constitution, les lois et l’ordre public du pays.

Dat ass am „programme gouvernemental“ ënnert der Rubrik „dialogue interculturelle“ ze liesen. Engersäits halen ech dat fir eng duerchaus iwwerfälleg a begréissenswäert Initiativ, zum aneren huet se awer och e fade Bäigeschmaach.

Positiv

Dofir schwätzt a mengen Aen, dat mer zu Lëtzebuerg sécherlech eng Institutioun oder eng Instanz gebrauche kennen, déi sech ganz konkret fir d’Interessien vun Atheisten, Agnostiker, Humanisten an sou weider asetzt, an där hier Fuerderungen iwwert déi no der Trennung vu Kierch a Stat erausgin. Dëst konnt een an de leschte Méint a Joeren bei Themen ewéi der Stierfhëllef, Avortement, Homoehen asw. ëmmer erëm feststellen. Op dir enger Säit huet een d’Kierch stoen, déi Mëttelalter priedegt, an op dir aner Säit e Kuddelmuddel aus kritesche Stemmen, déi méi mat sech selwer ze kämpfen hunn, ewéi dat se e staarke Géigepol zur Kierch duerstelle kéinten.

Esou eng Interessevertriedung sollt menger Meenung no verschidden Aufgabe hunn. Als éischt emol misst natierlech iwwert déi Weltanschauungen opgekläert ginn. Zum Beispill misst mat Märecher ewéi ënnert anerem deem, dat et ouni Relioun keng Moral get, opgeraumt ginn. En atheistescht, naturalistescht Weltbild ass nämlech en immens fruchtbaart Substrat fir eng fortschrëttlech Ethik. Se kéint och als Plattform dofir dengen, datt Atheismus & co net just en Attribut vun der perséinlecher Weltanschauung  bleiwen, mee kulturell och ausgelieft a weiderentwéckelt kéinte ginn.

Eng weider wichteg – ech géif soen déi wichtegst iwwerhaapt – Aufgab géif dora bestoen, Infrastrukturen a Servicer unzebidden, déi e prakteschen Humanismus erméiglechen, oder an anere Wieder: net-reliéis Zeremonien, ewéi zum Beispill Hochzäitsfeieren oder Begriefnisser. Et ass jo hautdesdaags esou, dat vill jonk Leit, déi mat Relioun usech iwwerhaapt näischt um Hutt hunn, sech trotzdem an der Kierch bestueden, well se do ganz einfach deen méi attraktive Kader gebuede kréien. Ech denken, dat de Mënsch – vläit net jiddereen, awer vill – e gewëssent Bedierfnis no Zeremonien huet. Eng Demande fir esou net-reliéis Feierlechkeeten wier sécherlech do. Dobäi muss een awer och bedenken, dat d’Kierch haut nach ëmmer de Monopol an deem Beräich vum gesellschaftleche Liewen huet. Wann een géint d’gesellschaftlech Muechtstellung vun der Kierch virgoe well, da muss een Alternativen an deem Beräich ubidden. Hier Legitimitéit schaaft d’Kierch hautdesdaags nämlech net méi aus dem Glawen vun de Leit, mee eben duerch déi Monopol-Stellung. Dat gëllt natierlech net just fir Hochzäiten, mee och fir Begriefnisser an aner gesellschaftlech a kulturell Evenementer oder Riten.

Negativ

Wéi wuel net anescht ze erwaarden, wann esou e Konzept aus dem Brutkasten vun der CSV kennt, huet déi „Maison de la Laïcité“ och en onverdaulechen Hoken.

Eppes, wat a mengen Aen zwar net entscheedend sollt sinn, awer trotzdem zu enger onnéideger Begrëffsverwirrung féiert, dat ass schon de Numm „Maison de la Laïcité“. Laizitéit heescht jo graff betruecht näischt anescht, ewéi dat de Stat sech a reliéisen a weltanschauleche Froen neutral verhält a keng Privilegien dir enger oder anerer Relioun/Weltanschauung erméiglecht. Wa mer awer elo higinn an d’Laizitéit, déi usech eng politesch Uerdnung a keng Weltanschauung ass, selwer als Weltanschauung an engem gewësse Sënn privilegéiere wëllen, dann féiere mer se an hirem Wiesen ad absurdum. Vun dohier géif ech deem Projet vu vir eran en anere Numm ginn. Eppes wat mat Atheismus oder Humanismus ze dinn huet, wourems et heibäi eigentlech goe sollt, a net mat Laizismus. Mee bon, um Numm sollt et menger Meenung no net scheiteren.

Méi wichteg ass dann awer d’Fro vun der Finanzéierung. Esou wéi ech dat verstan hunn, sollt de Stat dat zu engem Groussdeel finanzéieren, a gläichzäiteg well d’Regierung och um Konventiounssystem fir de Finanzement vun de Reliounen festhalen. Wann eis nei Regierung sech elo esou progressiv get an effektiv eppes fir déi net-reliéis Leit am Land maache well, dann misst se awer och esou konsequent sinn an déi ganz Finanzéierung vun de Reliounen a Weltanschauungen op eng gerecht Basis stellen. Ech ginn de Verdacht net lass – zumol mat Bléck op d’CSV – dat et heibäi och dorëms geet, dem laizistesche Widerstand géint d’Virmuechtstellung vun der Kierch e bëssen de Wand aus de Segelen ze huelen. Mir sollen eng kleng Grimmelchen vum Kuch ofkréien, fir datt d’kathoulesch Kierch de grousse Recht vum Kuch weiderhin fir sech reklamméiere kann. An eben do leit de Problem: wien decidéiert, wéi eng Relioun oder Weltanschauung wéivill vum Kuch ofkritt? Wisou kritt d’kathoulesch Kierch 99% (Konventioun + Kierchefabriken + sonsteg finanziell Privilegien) vum Kuch? Ass hire Gott méi geldsüchteg? Sinn hir Argumenter besser? Ass hir Moral besser? Neen, dat schéngt mir ganz einfach dorun ze leien, dat zu Lëtzebuerg als Katholik gëllt, wien als onmündege Baby an den Dafregester agedroen ginn ass, wat natierlech eng grouss Majoritéit (iwwer 80%) vun der Bevëlkerung ass. Geet dat duer fir als Katholik ze gëllen? Geet dat duer fir d’kathoulesch Kierch därmoossen ze privilegéieren? Kaum. Wann ee sech aner Zuelen ukuckt, zum Beispill déi vun de regelméissegen Kierchegänger, 3-15% je nodeems, wien ee freet, dann sinn déi 99% vun der finanzieller Hëllef sécherlech net méi gerechtfäerdegt. Wéivill Katholiken hu mer dann elo? 3% oder 80%? Ech kann déi Fro net beäntweren an den Här Juncker kann se och net beäntweren, wat ganz einfach dorun leit, datt just den eenzelne Mënsch selwer bestëmme kann, vu wéienger Weltanschauung e sech ugezu fillt. Duerfir, wann eis nei Regierung gesellschaftspolitesch Fortschrëtter maache well, dann kann den éischte Schratt just doran bestoen, gerecht Verhältnisser an dir Fro ze schafen, an dat geet just andeems se e Finanzéierungssystem aféiert, deen d’Gelder representativ zu de realen Iwwerzeegungen an der Bevëlkerung verdeelt. Dir Ufuerderung gerecht ginn déi verschiddenst Modeller vun Memberskaarten bis zur Kierchesteier. Am Kader vun engem gerechten Finanzéierungsmodell wier och eng „Maison de la Laïcité“ oder ähnlech e grousse Fortschrëtt, am aktuelle Kader riskéiert se zur Farce ze ginn.